ភ្នំពេញ: អតីតអ្នកប្រដាល់បោះជំហានចូលក្នុងវិស័យហិរញ្ញវត្ថុ៖ ភាពភ្ញាក់ផ្អើលរបស់កីឡាករ ដាវ លីឌុច អំពីការចូលរួមជាមួយនឹងក្រុមហ៊ុនវិនិយោគ Macrofund
នៅក្នុងអាជីពដែលមិននឹកស្មានដល់ ដាវ លីឌុច ដែលជាម្ចាស់ជើងឯកពិភពលោក Lethwei ដ៏ល្បីល្បាញបានប្តូរក្រណាត់រុំដៃប្រដាល់របស់គាត់ទៅជាសម្លៀកបំពាក់បែបអ្នកជំនួញវិញ។ កីឡាករប្រដាល់សញ្ជាតិកាណាដាបានចូលរួមជាមួយ Macrofund ក្នុងមុខតំណែងថ្មីជាប្រធានផ្នែកទំនាក់ទំនងនិងប្រព័ន្ធផ្សព្វផ្សាយ។
ដំណឹងនេះបានលេចឡើងបន្ទាប់ពីកិច្ចប្រជុំដ៏ល្បីមួយនៅទីក្រុងភ្នំពេញ ដែលថា លីឌុច ត្រូវបានគេប្រទះឃើញជាមួយនឹងស្ថាបនិកក្រុមហ៊ុន Macrofundគឺលោក អេនដ្រូ នីសិនបុម ក្នុងការពិភាក្សាជាមួយឧបនាយករដ្ឋមន្ត្រី ស៊ុនចាន់ថុល របស់ប្រទេសកម្ពុជា។ កិច្ចប្រជុំបានគូសបញ្ជាក់ពីសក្តានុពលវិនិយោគដែលកំពុងរីកចម្រើនរបស់កម្ពុជា និងសារៈសំខាន់ខាងផ្នែកយុទ្ធសាស្ត្រនៅក្នុងតំបន់អាស៊ីអាគ្នេយ៍។
លីឌុច មានប្រវត្តិផ្នែកហិរញ្ញវត្ថុ មិនមែនជាបុគ្គលចម្លែកចំពោះឧស្សាហកម្មនេះទេ។ លីឌុច បានចែករំលែកថា ‹‹ខ្ញុំបានឈានជើងចូលក្នុងពិភពហិរញ្ញវត្ថុជាថ្មីម្តងទៀតបន្ទាប់ពីអស់រយៈពេលជាង ១៣ ឆ្នាំមកហើយ។ នៅពេលខ្ញុំមានអាយុ ១៩ ឆ្នាំ ខ្ញុំបានក្លាយជាអ្នកគ្រប់គ្រងផ្នែកអភិវឌ្ឍន៍កម្ចីទិញផ្ទះដែលមានអាយុក្មេងជាងគេក្នុងប្រវត្តិសាស្ត្ររបស់ធនាគារលូរេនធៀននៃប្រទេសកាណាដា (Laurentian Bank of Canada)››។ ការផ្លាស់ប្តូររបស់គាត់ចូលទៅក្នុងអាណាចក្រជំនួញ សបញ្ជាក់ឱ្យឃើញពីភាពបត់បែន និងផ្នត់គំនិតយុទ្ធសាស្ត្ររបស់គាត់។
Macrofund ដែលត្រូវបានគេស្គាល់ថាជាអ្នកជំនាញពាណិជ្ជកម្មម៉ាក្រូ និងភាពវៃឆ្លាតភូមិសាស្ត្រនយោបាយ បន្តកំណត់ស្តង់ដារក្នុងការផ្តល់នូវការយល់ដឹងអំពីការផ្លាស់ប្តូរទីផ្សារ។ ជាមួយនឹងក្រុមធ្លាប់មានសមាសភាពមកពីអតីតពាណិជ្ជករវិនិយោគជាកម្មសិទ្ធិផ្ទាល់ខ្លួនខាងធនាគារ អ្នកគ្រប់គ្រងមូលនិធិការពារហានិភ័យ និងអ្នកសិក្សាឆ្នើម Macrofund ផ្តល់នូវការវិភាគស៊ីជម្រៅនៅទូទាំងថ្នាក់ទ្រព្យសម្បត្តិផ្សេងៗ។ គំរូជម្រើសដែលមានកម្មសិទ្ធិរបស់ក្រុមហ៊ុននេះ ផ្តល់នូវទស្សនវិស័យតែមួយគត់ ជាពិសេសមានតម្លៃក្នុងការវាយតម្លៃទីផ្សារដែលកំពុងរីកចម្រើនដូចជាប្រទេសកម្ពុជា។
ក្នុងជំនួបនោះ Macrofund បានលើកឡើងពីកត្តាជំរុញសំខាន់ៗមួយចំនួនស្តីពីកំណើនសេដ្ឋកិច្ចដ៏គួរឱ្យចាប់អារម្មណ៍របស់កម្ពុជា។ ពួកគេបានចង្អុលបង្ហាញអំពីផែនការសម្រាប់បណ្តាញផ្លូវដែកល្បឿនលឿន ដើម្បីកែលម្អការតភ្ជាប់ក្នុងតំបន់ និងការអភិវឌ្ឍន៍ជាយុទ្ធសាស្រ្តនៃព្រែកជីកហ្វូណនតេជោ ដែលត្រូវបានរំពឹងថានឹងពង្រឹងគុណសម្បត្តិពាណិជ្ជកម្មរបស់កម្ពុជាតាមដងទន្លេមេគង្គ។ យោងតាម Macrofund ប្រទេសកម្ពុជាមានប្រជាសាស្រ្តល្អបំផុតនៅអាស៊ី ដែលផ្តល់កម្លាំងពលកម្មយ៉ាងស្វាហាប់សម្រាប់កំណើននាពេលអនាគត។
តម្លៃអចលនទ្រព្យនៅក្នុងទីក្រុងដូចជាខេត្តព្រះសីហនុបានកើនឡើង 800% ចាប់តាំងពីឆ្នាំ 2018 ដែលបង្ហាញពីទីផ្សារអចលនទ្រព្យដែលកំពុងរីកចម្រើន។ ការវិនិយោគរបស់ចិនយ៉ាងឆាប់រហ័ស បានបង្កើតឱកាសរួមយ៉ាងសំខាន់ក្នុងវិស័យហិរញ្ញវត្ថុ។ គំរូប្រជាសាស្រ្តរបស់ Macrofundបង្ហាញពីកំណើនសេដ្ឋកិច្ចប្រកបដោយនិរន្តរភាព ដែលជំរុញដោយប្រជាជនវ័យក្មេង និងរស់រវើក។
ឧបនាយករដ្ឋមន្ត្រី ស៊ុន ចាន់ថុល មានបំណងចង់ឱ្យ Macrofund ជួបជាមួយឯកឧត្តម ស៊ូ សុជាតិ អគ្គនាយកនិយតករមូលបត្រកម្ពុជា (SERC) និងជាប្រធានផ្សារមូលបត្រកម្ពុជា (CSX) ដើម្បីជំរុញកំណើនសេដ្ឋកិច្ច និងស្វែងរកឱកាសវិនិយោគថ្មីៗនៅកម្ពុជា។
លីឌុច បានសម្តែងការសាទរចំពោះការចូលរួមជាមួយ Macrofund នៅក្នុងធ្វីតជាបន្តបន្ទាប់ដោយបញ្ជាក់ថា ‹‹វាជាកិត្តិយសណាស់ដែលបានជួបជាមួយឧបនាយករដ្ឋមន្ត្រី ស៊ុន ចាន់ថុល អនុប្រធានក្រុមប្រឹក្សាអភិវឌ្ឍន៍កម្ពុជា››ហើយ ‹‹ខ្ញុំពិតជាមានសេចក្តីសោមនស្សរីករាយជាខ្លាំងដែលខ្ញុំបានចូលរួមជាមួយ Macrofund ជាប្រធានផ្នែកទំនាក់ទំនង និងយុទ្ធសាស្ត្រប្រព័ន្ធផ្សព្វផ្សាយ។ សូមអរគុណ អេនដ្រូ នីសិនបុម សម្រាប់ការជឿទុកចិត្តរបស់អ្នក។››
អេនដ្រូ នីសិនបុម ស្ថាបនិក Macrofund មានប្រវត្តិគួរឱ្យចាប់អារម្មណ៍ក្នុងផ្នែកហិរញ្ញវត្ថុ។ គាត់ទទួលបានបរិញ្ញាបត្រវិទ្យាសាស្ត្រសេដ្ឋកិច្ចពីសាលា វ័រតុន នៃសាកលវិទ្យាល័យផេនស៊ីលវ៉ានៀ។ នីសិនបុម ធ្លាប់បម្រើការជាប្រធានផ្នែកស្រាវជ្រាវម៉ាក្រូនៅ Soros Fund Management និងបានធ្វើការជាពាណិជ្ជករវិនិយោគជាកម្មសិទ្ធិផ្ទាល់ខ្លួននៅធនាគារធំៗមួយចំនួន។
ឥឡូវនេះ លីឌុច រស់នៅក្នុងប្រទេសកម្ពុជាជាមួយគ្រួសាររបស់គាត់ដោយសារតែប្រទេសកម្ពុជាមានសុវត្ថិភាព និងការរីកចម្រើនយ៉ាងឆាប់រហ័ស។ លោកបានចែករំលែកថា ‹‹ព្រះរាជាណាចក្រកម្ពុជាពិតជាបើកចំហសម្រាប់ពិភពលោក ស្វាគមន៍អ្នកវិនិយោគបរទេស ហើយយើងមានបំណងគាំទ្រដល់កំណើននេះ។»
ជាមួយនឹងការចូលរួមរបស់ លីឌុច ព្រមទាំងមានភាពជាអ្នកដឹកនាំរបស់ នីសិនបុម ធ្វើឱ្យ Macrofund មានជំហររឹងម៉ាំក្នុងការពង្រឹងបន្ថែមនូវយុទ្ធសាស្រ្តទំនាក់ទំនងរបស់ខ្លួន និងពង្រីកវត្តមានប្រព័ន្ធផ្សព្វផ្សាយរបស់ខ្លួន។ក្រុមហ៊ុននៅតែប្តេជ្ញាចិត្តក្នុងការផ្តល់នូវការវិភាគ និងការយល់ដឹងគ្រប់ជ្រុងជ្រោយ ដោយជួយវិនិយោគិនរុករកភាពស្មុគស្មាញ និងចាប់យកឱកាសនៅក្នុងទីផ្សារថាមវន្តរបស់ប្រទេសកម្ពុជា។